गोवा राज्यात प्रथमच ‘भारतीय मूल्ये आणि संस्कृती’ यांच्या प्रमाणपत्र अभ्यासक्रमाला आरंभ !

      काणकोण येथील ‘ज्ञान प्रबोधिनी मंडळा‘चे ‘श्री मल्लिकार्जुन आणि श्री. चेतन मंजू देसाई महाविद्यालय‘ आणि ढवळी, फोंडा येथील ‘महर्षि अध्यात्म विश्‍वविद्यालय‘ यांनी एक संयुक्त उपक्रम आरंभ केला आहे. भारतीय संस्कृती, अध्यात्म, नीतीमूल्ये आणि राष्ट्र उभारणी या विषयांवर ‘ऑनलाईन‘ प्रमाणपत्र अभ्यासक्रम विद्यार्थ्यांसाठी उपलब्ध केला आहे. या अभ्यासक्रमामध्ये प्रत्येकी एक तासाचे एकूण 30 वर्ग घेण्यात येणार असून यामध्ये विद्यार्थ्यांकडून दोन प्रकल्पही करवून घेण्यात येणार आहेत. हा अभ्यासक्रम नुकताच प्रारंभ झाला असून ‘गुगल मीट‘च्या माध्यमातून सायंकाळी 5 ते 6 या वेळेत शिकवला जाणार आहे. जून 2022 मध्ये या अभ्यासक्रमाची सांगता होणार असून या अभ्यासक्रमाच्या अंती विद्यार्थ्यांना प्रमाणपत्र देण्यात येणार आहे. ‘श्री मल्लिकार्जुन आणि श्री. चेतन मंजू देसाई महाविद्यालया‘चे प्रा. केवल नाईक हे या अभ्यासक्रमाचे समन्वयक आहेत. भारतीय मूल्ये आणि संस्कृती शिकवणारा हा अभिनव असा अभ्यासक्रम गोवा राज्यात प्रथमच होत असून विद्यार्थ्यांसाठी ही सुवर्णसंधी आहे. विद्यार्थ्यांना त्यांच्या सर्वांगीण विकासासाठी या अभ्यासक्रमाचा लाभ होईल, असा विश्‍वास महर्षि अध्यात्म विश्‍वविद्यालय आणि श्री मल्लिकार्जुन आणि श्री. चेतन मंजू देसाई महाविद्यालय यांनी व्यक्त केला आहे.

अभ्यासक्रम राबवण्यासाठी दोन्ही संस्थांमध्ये सामंजस्य करार करण्यात आला. या करारावर ‘श्री मल्लिकार्जुन आणि श्री. चेतन मंजू देसाई महाविद्यालया‘चे प्राचार्य डॉ. मनोज एस्. कामत, तर ‘महर्षि अध्यात्म विश्‍वविद्यालया‘चे प्रकल्प अधिकारी श्री. चेतन राजहंस यांनी स्वाक्षरी केल्या. या वेळी श्री. रामदास सावंत, श्री. विविध पावसकर आणि प्रा. केवल नाईक, श्री. रमेश शिंदे, प्रा. महावीर श्रीश्रीमाळ, श्री. सत्यविजय नाईक आणि श्री. संदीप शिंदे हे उपस्थित होते.

या अभ्यासक्रमाच्या माध्यमांतून सनातन मूल्यांची शिकवण आणि पद्धतींचा परिचय होईल. ‘साधना आणि अध्यात्म, संस्कृतीनुसार आचरण‘, ‘भारतीय संस्कृतीची वैशिष्ट्ये‘ आणि ‘स्वभावदोष निर्मूलन आणि व्यक्तीमत्व विकास‘ आदी अनेक विषयांचा या अभ्यासक्रमात समावेश करण्यात आला आहे. एकूणच विद्यार्थ्यांमधील मूल्य शिक्षणाला प्रोत्साहन देण्यात येणार आहे. या अभ्यासक्रमात विविध विषयांवरील परिषद आणि परिसंवाद, विद्यार्थी आणि प्राध्यापक देवाणघेवाण कार्यक्रम, वाचन आणि संदर्भ सामग्री विकसित करण्याचा मानस आहे.