बरीच वर्षे प्रलंबित असलेल्या भूगटार वाहिनीच्या कामाला सुरवात करण्याचा म्हणजे प्रभागातील घरांना या भूगटार वाहिनीशी जोडण्याचा महत्वपूर्ण निर्णय तसेच इतर निर्णय आजच्या म्हापसा नगरपालिकेच्या सर्वसाधारण बैठकीत घेण्यात आल्याचे नगराध्यक्षा शुभांगी वायंगणकर यांनी सांगितले

म्हापसा शहरासाठी उभारण्यात आलेला सिव्हरेज ट्रीटमेंट प्लांट कार्यन्वयित झाल्याचे नुकत्याच करण्यात आलेल्या पाहणीत आढळल्याने सुरवातीला पहिल्या टप्प्यात प्रभाग क्र.7,8,19, व 20 या नजीकच्या प्रभागातील घरांना भूगटार वाहिनीशी जोडण्यात येईल, त्यानंतर कोणताही अडथळा न आल्यास उर्वरित सर्व प्रभागातील घरांना जोडण्यात येईल.अंडरग्राऊंड केबलींग म्हणजे भूमिगत विजवाहिनी घालण्याच्या कामालाही पुन्हा गती देण्यात आली असून करोना महामारी व निवडणुका यामुळे काम रेंगाळले होते, दोन वर्षाचा कार्यकाळापैकी फक्त पाच महिनेच काम झाले होते, उर्वरित काम लवकर पूर्ण करण्याचे कंत्राटदाराला सांगण्यात आले आहे.
म्हापसा बाजारपेठ व इतर ठिकाणची सार्वजनिक सौचालयांची दुरुस्ती करण्याचा तसेच चणेकर लाईनचा पुढचा भाग, उसापकर लाईन, पानकर लाईन व युनियन फार्मसी ते जुने अझीलो रुग्णालया पर्यत पे पार्किंग करण्याचा निर्णय या बैठकीत घेण्यात आल्याचे नगराध्यक्षा शुभांगी वायंगणकर यांनी सांगितले.