मधुमेह, कर्करोगाबाबत जनजागृती करण्याची गरज : हळदोणाचे आमदार
पणजी: तरुणांसह अनेकांना मधुमेह तसेच कर्करोगाने ग्रासले असल्याने नागरिकांमध्ये या आजारांबाबत जनजागृती करण्याची गरज आहे, असे मत हळदोणचे आमदार ॲड, कार्लोस अल्वारेस फरेरा यांनी व्यक्त केले.
सेंट थॉमस उच्च माध्यमिक विद्यालय, हळदोणा येथील विद्यार्थ्यांनी शनिवारी सकाळी आयोजित केलेल्या वॉकेथॉनला हिरवी झेंडा दाखविल्यानंतर ते बोलत होते.
जागतिक मधुमेह दिन आणि राष्ट्रीय कर्करोग जनजागृती दिनानिमित्त हळदोणा प्राथमिक आरोग्य केंद्रातर्फे ‘एज्युकेट टू प्रोटेक्ट टुमारो’ या वॉकथॉनचे आयोजन करण्यात आले होते. हळदोणा प्राथमिक आरोग्य केंद्राचे आरोग्य अधिकारी डॉ रोशन नाझरेथ व संपूर्ण टीम तसेच शिक्षक उपस्थित होते.
“मधुमेह आणि कर्करोगाबाबत जागरूकता निर्माण करण्यासाठी ही विशेष मोहीम आयोजित करण्यात आली होती. तरुणांमध्येही मधुमेह आढळून येतो, तर अनेकांना कर्करोगानेही ग्रासले आहे. निरोगी जीवनशैली जगण्यासाठी आपल्याला आपल्या खाण्याच्या सवयी बदलण्याची गरज आहे,” असे ते म्हणाले.
“लोकांना अशा प्रकारच्या ड्राईव्ह पाहण्याची गरज आहे. अनेक वेळा, जेव्हा आजार प्रगत अवस्थेत असतो तेव्हा आपण डॉक्टर किंवा हॉस्पिटलशी संपर्क साधतो. काही वेळा, रुग्णाचा मृत्यू देखील होतो. ही मोहीम आयोजित करणे खूप चांगले आहे आणि मी खूप कृतज्ञ आहे” असे ते पुढे म्हणाले.
Loading ...
