राजेश फळदेसाई यांनी साव मथायस – दिवाडी उपसरपंचांचे केले अभिनंदन
पणजी : दिवाडीच्या मळार येथील साव मथायस पंचायतीच्या उपसरपंचपदी रुपेश होमकांडी यांची निवड झाल्याबद्दल कुंभारजुवाचे आमदार राजेश फळदेसाई यांनी त्यांचे अभिनंदन केले आहे. सरपंच सुप्रिया तारी यांच्यासह पंच सदस्यांच्या सत्ताधारी पॅनलच्या उपस्थितीत बुधवारी होमकांडी यांची निवड करण्यात आली.
यावेळी बोलताना फळदेसाई यांनी सत्ताधारी पंचायत सदस्यांनी गावाच्या विकासासाठी काम करावे व गावाच्या गरजा भागविण्यासाठी गावातील सदस्यांशी तसेच एकमेकांशी सल्लामसलत करून एकत्र काम करावे, असे आवाहन केले.
फळदेसाई यांनी सरपंच, उपसरपंच व सत्ताधार्‍यांना सर्वतोपरी मदत करण्याचे आश्वासन देऊन त्यांचे प्रस्ताव शासनाकडे नेण्यासाठी व संबंधित मंत्र्यांसमोर मांडण्यासाठी सर्वतोपरी प्रयत्न करण्याचे आश्वासन दिले.
गावाच्या भल्यासाठी पंचायत समितीने सर्वांगीण स्तरावरून सातत्याने पाठपुरावा करावा आणि आगामी काळात मतदारांची सदिच्छा जिंकण्यावर भर द्यावा, असे आवाहन फळदेसाई यांनी केले आहे.
तळागाळातील लोकप्रतिनिधी हे लोकशाहीचे खरे सैनिक आहेत. त्यांच्यामुळेच सरकारला तळागाळापर्यंत पोहोचणे शक्य होते. त्याच्यामुळेच व्यक्ती म्हणून आणि एक समुदाय म्हणून हक्कांसाठी लढण्यास सर्वसामान्यांना मदत होते. त्यांनी आपल्या क्षमतेनुसार आपली कर्तव्ये पार पाडावीत त्यामुळे केवळ सार्वजनिक जीवनातच नाही तर समाजातही त्यांना चांगले स्थान मिळण्यास मदत होईल, असे फळदेसाई म्हणाले.
Loading ...
