फोंडा – मा. पंतप्रधान नरेंद्र मोदीजी यांनी नुकतेच नालंदा येथे प्राचीन विश्वविद्यालयाच्या जवळ नवीन कॅम्पसचे उद्घाटन केले. ज्या प्रमाणे प्राचीन विश्वविद्यालयाचे एकप्रकारे पुनरूत्थान चालू आहे. तसेच उत्तरप्रदेशातील विद्यमान योगी सरकारने राममंदिराचा इतिहास अभ्यासक्रमात समाविष्ट करण्याचा स्तुत्य निर्णय घेतला. तेथे केवळ राममंदिरच नव्हे, तर धार्मिक, पौराणिक, आध्यात्मिक विषयही मुलांना शिकवले जाणार आहेत. अशा प्रकारे उत्तरप्रदेशातील योगी सरकार निर्णय घेऊ शकते, तर गोव्यातील भव्य आणि प्राचीन मंदिरांचा इतिहास, पोर्तुगीज काळात झालेला मंदिरांचा विध्वंस, ‘इन्क्विझिशन’द्वारे झालेले अत्याचार, गोमंतकियांनी मंदिरे आणि संस्कृती रक्षणासाठी दिलेला लढा, हा इतिहास का शिकवला जाऊ शकत नाही? गोमंतकाचा सत्य इतिहास विद्यार्थ्यांना शिकवला जावा, अशी आमची राज्य सरकारकडे मागणी आहे. या दृष्टीने गोव्यात २४ ते ३० जून २०२४ या कालावधीत होणार्‍या १२ व्या ‘अखिल भारतीय हिंदु राष्ट्र अधिवेशना’त अर्थात् ‘वैश्विक हिंदु राष्ट्र महोत्सवा’त चर्चा करून पुढील दिशा ठरवण्यात येईल, अशी माहिती ‘हिंदु जनजागृती समिती’चे महाराष्ट्र आणि छत्तीसगड राज्य संघटक श्री. सुनील घनवट यांनी पत्रकार परिषदेत दिली. फोंडा येथील हॉटेल ‘पॅन अरोमा’ येथे आयोजित पत्रकार परिषदेस हिंदु जनजागृती समितीचे दक्षिण गोवा राज्य समन्वयक श्री. सत्यविजय नाईक आणि अधिवक्ता शैलेंद्र नाईक हे उपस्थित होते.
या वेळी हिंदु जनजागृती समितीचे दक्षिण गोवा राज्य समन्वयक श्री. सत्यविजय नाईक म्हणाले की, यंदा गोव्यात होणार्‍या वैश्विक हिंदु राष्ट्र महोत्सवा’साठी श्रीदत्त पद्मनाभ पीठाधीश्वर पद्मश्री सद्गुरु ब्रह्मेशानंद महाराज, तसेच राष्ट्रीय स्वयंसेवक संघाचे गोवा राज्य संचालक श्री. राजन भोबे यांनाही अधिवेशनाचे निमंत्रण देण्यात आले आहे. या अधिवेशनाला अमेरिका येथून नीलेश नीलकंठ ओक, त्रिनिदाद आणि टोबॅगो येथून स्वामी ब्रह्मस्वरुपानंद महाराज, घाना येथून श्रीनिवास दास, नेपाळमधून श्री. शंकर खराल आणि इंडोनेशिया येथून श्री. धर्म यशा हे येणार आहेत. या अधिवेशनास देशभरातून हिंदुत्वनिष्ठ अधिवक्ते, उद्योजक, विचारवंत, लेखक, पत्रकार, मंदिर विश्वस्त, तसेच अनेक समविचारी संघटनांचे प्रतिनिधी उपस्थित रहाणार आहेत. या वेळी अधिवक्ता शैलेंद्र नाईक म्हणाले की, २९ ते ३० जून या कालावधीत ‘अधिवक्ता संमेलन’ आयोजित करण्यात येणार आहे. यामध्ये हिंदु संघटना, कार्यकर्ते यांच्यावर होणार्‍या अत्याचारांच्या संदर्भात न्यायालयीन साहाय्य करणारे, विविध आघातांच्या विरोधात न्यायालयीन लढा देणारे देशभरातील अधिवक्ते या संमेलनात सहभागी होणार आहेत. यातून कार्याची पुढील दिशा ठरवण्यात येणार आहे.
या अधिवेशनाचे थेट प्रक्षेपण हिंदु जनजागृती समितीचे संकेतस्थळ HinduJagruti.org याद्वारे, तसेच समितीच्या ‘HinduJagruti’ या ‘यु–ट्यूब’ चॅनेलवरून होणार आहे. जगभरातील हिंदुत्वनिष्ठांनी या ‘वैश्विक हिंदु राष्ट्र महोत्सवा’चा लाभ घ्यावा, असे आवाहन श्री. सत्यविजय नाईक यांनी शेवटी केले.
Loading ...
