पणजी प्रतिनिधी
२२ जुलै २०२४
जुने गोवे येथील अवशेष प्रदर्शनासाठीची १७ कोटी रुपयांची पायाभूत सुविधांची कामे सुरू होणे बाकी : फळदेसाई
पणजी: गोवा पुनर्वसन मंडळाचे अध्यक्ष आणि कुंभारजुवाचे आमदार राजेश फळदेसाई यांनी सोमवारी सेंट फ्रान्सिस झेवियरच्या अवशेषांच्या प्रदर्शनाच्या पार्श्वभूमीवर जुने गोवे येथे पायाभूत सुविधांची कामे सुरू न झाल्याचा मुद्दा उपस्थित केला.
प्रदर्शनासाठी जुने गोवेच्या सुशोभीकरणाच्या कामावर १७ कोटी रुपयांचा प्रकल्प सुरू झालेला नाही. पंतप्रधानांच्या हस्ते त्याचे उद्घाटन झाले होते. या समितीत असल्याने मी त्याचा पाठपुरावा करत आहे. ही कामे मोठ्या स्वरुपाची आहेत. जुने गोवे येथे मोठ्या संख्येने लोक येणार आहेत आणि त्यामुळे ही कामे महत्त्वाची असल्याने त्याकडे दुर्लक्ष करता येणार नाही. ही कामे कधी सुरू होतील, हे पर्यटनमंत्र्यांनी सांगावे, असे ते म्हणाले.
दिवाडी चर्च येथील उद्यानाच्या सुशोभीकरणाचे काम कधी सुरू होणार याचीही माहिती घेतली. फाइल पास झाली पण काम सुरू झाले नाही. या परिसरातून अटल सेतूचे छान दर्शन होते. बरेच पर्यटक या बेटाला भेट देतात, असे फळदेसाई म्हणाले.
आमदारांनी त्यांच्या मतदारसंघात आयोजित बोंदेरा आणि सांगोड उत्सवासाठी अतिरिक्त निधीची मागणी केली.
दोन बोंदेरा उत्सव आयोजित केले जातात. एवढा मोठा महोत्सव आयोजित करण्यासाठी जवळपास ५० लाख रुपये खर्च येतो, परंतु पर्यटन विभागाकडून आम्हाला केवळ २ लाख रुपये मिळतात. पुढील महिन्यात होणार्‍या या महोत्सवासाठी २५ हजारांहून अधिक लोक येणार आहेत. सांगोडलाही खूप गर्दी होते. आम्ही स्वतःहून निधीची व्यवस्था करण्याचा प्रयत्न करतो. सांगोडसाठी सुमारे २५ लाख रुपयांची तरतूद करावी, अशी मी मंत्र्यांना विनंती करतो, असे ते म्हणाले.
दिवाडीमध्ये जलक्रीडा उपक्रम सुरू करण्यासाठी पुढाकार घेण्याची आवश्यकता त्यांनी व्यक्त केली. त्यामुळे सुमारे १५० तरुणांना रोजगार मिळेल, असे ते म्हणाले.
गोवा माइल्सला करमळी रेल्वे स्थानकावर काउंटर सुरू करण्यास परवानगी दिल्यास त्याचा स्थानिक टॅक्सी चालकांवर परिणाम होईल, असेही फळदेसाई म्हणाले. स्थानिक टॅक्सी मालकांना ३-४ दिवसांतून एकदा व्यवसाय मिळतो. गोवा माइल्स काउंटर रेल्वे स्थानकावर उभारल्यास त्याचा विपरित परिणाम होईल, असे ते म्हणाले.
Loading ...
